Dedh Trei Hans Trei Ügens ha Pemp

De Merher, degves warn ügens mis Kevardhû

Wednesday, 30th December

Newher my a sayas kemeres fôtô a'n loor leun, bes comolek o an nos. Nag o an loor cler.  Hei a wrüg mos menowgh mes a wel adhelher dhe'n cloudys. Hy golow a spladnas der an cloudys bes na aljama gweles bejeth "an den e'n loor". "An Loor Yeyn" ew hei, an diwettha loor leun an vledhen. Henwys ew hei "Loor Nosow Hir" ewedh. Na whath, my alja gweles planet gòlow dres an gwedh. Pe planet? Na wòrama!  Hedhyw, my a gerdhas rag ow yehes, bes na wrüga vy kerdhes gen plesour. Ple ma an howl? Gellys ew an gwens, còsel ew an ayr, bes loos ew an ebòrn, pecar'a plobm. Nag eus todnow brâs war an mor loos. Gerowgh nei dhe bedery adro dhe hav. Martesen whei alja gwil castilly treth reb an mor - po, gwell, tarow pecar'a hebma. Ew da gena whei dismygow? A ellowgh gorryby hebma? Ewa qwestyon a reknans po gramatek? Ma dhebm whegh oy. My a dorras dew oy, my a frias dew oy, my a dhebras dew oy. Peseul a oyow ew gerys?

Last night I tried to take a photo of the full moon, but the night was cloudy. The moon was not clear. It often disappeared behind the clouds. Its light shone through the clouds, but I couldn't see a face of "the man in the moon". It's "The Cold Moon", the last full moon of the year. It's also called "Long Nights Moon". Never mind, I could see a bright planet through the trees. Which planet? I don't know!  Today, I walked for my health, but I didn't walk with pleasure. Where is the sun? The wind has gone, the air is still, but the sky is grey, like lead. There are no big waves on the grey sea. Let's think about summer. Perhaps you could make sandcastles by the sea - or, better, a bull like this one. Do you like riddles? Can you answer this? Is it a question of calculation or grammar? I have six eggs. I broke two eggs, I fried two eggs, I ate two eggs. How many eggs are left?

Deg ger rag hedhyw: Ten words for today

bejeth (m) face

castilly treth sandcastles < castel treth (m)

dismygow riddles, puzzles <dismyk (m)

gorryby to answer

gramatek (f) grammar

menowgh frequently, often

plobm (m) lead (cf. Latin plumbum)

reknans (m) calculation

tarow (m) bull

todnow waves

yehes (m) health (SWFM yeghes)